Суҳбат оид ба ҳамкорӣ бо табиби шинохта

Суҳбат оид ба  ҳамкорӣ бо табиби шинохта

18 марти соли 2022 Консули генералии Ҷумҳурии Тоҷикистон дар шаҳри Екатеринбург Зафар Сайидзода бо табиби дар Тоҷикистон ва Россия шинохта, асосгузор ва роҳбари Иттиҳоди байналмилалии нависандагон ва табибон Муллозуҳур Тоҳирӣ мулоқот намуд.

Мусоҳибон масъалаҳои ҳамкориро дар бахши тарбия ва таблиғи арзишҳо ва василаҳои густариши тарзи ҳаёти солим дар байни аъзои  диаспораи тоҷикон ва муҳоҷирони меҳнатии тоҷикистонӣ, ки дар минтақаи Урал кору зиндагӣ мекунанд, муҳокимаву баррасӣ намуданд.

Муллозуҳур Тоҳирӣ  Нақшаи кории Шӯрои ҷамъиятии назди Консулгарии генералии Ҷумҳурии Тоҷикистонро дар шаҳри Екатеринбург барои соли 2022 ба таври мусбат арзёбӣ  намуда, омодагии худро ҷиҳати  иштироки фаъолона дар татбиқи амалии баъзе аз бандҳои он изҳор кард.

Табиби шинохта ба дипломати тоҷик китобчаи нави пурмуҳтаво  худро бо номи “Зиндагӣ замоне зебост, ки мо солим ҳастем!”, ки чанде қабл дар Россия нашр шудааст, ҳадя намуд.

Дар ин суҳбати муфид ходими собиқадори  телевизионии тоҷик Абдулло Муҳаммадиев иштирок дошт.