Консули генералӣ мусулмонони вилояти Свердловскро бо иди Фитр табрик намуд

Субҳи барвақти 13 майи соли 2021 Консули генералии Ҷумҳурии Тоҷикистон Зафар Сайидзода ба қароргоҳи Муфтиёти марказии мусулмонони вилояти Свердловск дар шаҳри Екатеринбург ба муносибати иди саиди мусулмонон Фитр омада, ибодатгарони сершумори масҷиди онро бо ин ҷашн, ки ба итмоми моҳи шарифи Рамазон бахшида шуда буд, табрик намуд.

Пеш аз оғози намози идона дипломати тоҷик дар суханронии табрикотиаш иштирокчиёни намозгузории ҷашниро ба такомули ҳамешагии маънавию ахлоқӣ, ҳифз ва таҳкими меҳвари ахлоқии шахсияти хеш, густариши арзишҳои олии маънавӣ дар ҷомеа, дар он роиҷ сохтани таҳаммулпазирии байнимиллию байнимазҳабӣ, фароҳам овардани фазои ризоияти иҷтимоӣ ва бунёдкории осоишта даъват кард.