Ифтори дӯстӣ
Шоми 8 майи соли 2021 дар шаҳри Екатеринбург, дар толори меҳмонон ва масҷиди Муфтиёти марказии мусулмонони вилояти Свердловск, ифтори муштараки тоҷикону қирғизҳо баргузор шуд.
Аз ҷониби Тоҷикистон Консули генералии Ҷумҳурии Тоҷикистон дар шаҳри Екатеринбург Зафар Сайидзода, намояндаи расмии Вазорати меҳнат, муҳоҷират ва шуғли аҳолии Ҷумҳурии Тоҷикистон дар минтақаи Урал Беҳрӯз Холиқов, кормандони масъули муассисаи консулӣ, фаъолони диаспораи маҳаллии тоҷикон ширкат варзиданд. Ҷониби мардумии қирғизро дар ифтори дӯстӣ ибодатгарони фаъоли масҷиди Муфтиёти марказии вилояти Свердловск намояндагӣ карданд.
Пас аз ба итмом расонидани ифтор иштирокчиёни он бо ибодатгарони дигари масҷид суҳбат карданд, онҳоро бо иди бузурги Зафар (9 май) табрик намуданд, зарурати дар ҷомеаи муосир пойдор кардани мавқеи арзишҳои олии маънавию ахлоқӣ ва дӯстию ҳамдастии миллатҳоро якдилона таъкид сохтанд.
Ифтор дар фазои бародарона ва хеле гарму самимӣ доир гашт.Ин чорабинӣ бо иштироки фаъолтарини Муфтии мусулмонони вилояти Свердловск Абдулқуддус Ашарин ташкил ва гузаронида шуд.
