Сафари дипломати тоҷик ба шаҳри Тюмен
Сафари дипломати тоҷик ба шаҳри Тюмен
8-9 июни соли 2024 корманди дипломатии муассисаи консулӣ Субҳон Қурбонов барои аз наздик шинос шудан аз вазъи кору зиндагии муҳоҷирони меҳнатӣ--шаҳрвандони Ҷумҳурии Тоҷикистон ба шаҳри Тюмен сафари корӣ намуд.
Субҳон Қурбонов бо шаҳрвандони Тоҷикистон (ҳудуди 100 нафар) вохӯрӣ карда, роҷеъ ба зарурати ҳатмии риоя кардани қонунгузории россиягӣ, эҳтиром намудани суннату фарҳанги мардумони таҳҷоӣ, ҳазар кардан аз ҳизбу ҷунбишҳои номатлуб ва созмону гурӯҳҳои ифротгарову террористӣ, худдорӣ намудан аз тамошо ва таблиғи наворҳои мамнӯъ дар шабакаҳои иҷтимоӣ, роҳ надодан ба истеъмолу гардиши ғайриқонунии маводи мухаддир ва дахолат накардан ба равандҳои сиёсии дохилии кишвари иқомат ибрози андеша кард.
Муҳоҷирони меҳнатӣ ба саволҳои худ ҷавобҳои қонеъкунанда гирифта, барои таваҷҷуҳу ғамхории Ҳукумати Ҷумҳурии Тоҷикистон нисбат ба онон изҳори миннатдорӣ намуданд.
Баъди суҳбати самимию судманд дипломати тоҷик аз ҷойи зисту хоби муҳоҷирони меҳнатӣ дидан намуд ва ба корфармо Алишер Зокирҷонович Зокиров, ки шаҳрвандии Тоҷикистон ва Россияро соҳиб мебошад, тавсия дод, ки барои муҳоҷирони меҳнатӣ шароитро боз ҳам хубтар намояд ва дар аснои ҳуҷҷатгузории муҳоҷирони меҳнатӣ ба онҳо бевосита мадад расонад.
Дар вохӯрӣ раиси Шӯрои Ташкилоти минтақавии ҷамъиятии “Маркази фарҳангии тоҷикон “Пайванд””-и вилояти Тюмени Федератсияи Россия Абдулло Саидзода Каримов, муовинонаш ва соҳибкорони муваффақи тоҷиктабор иштирок доштанд.
Дар нимаи дуюми рӯзи 8 июни соли 2024 котиби якуми Консулгарии генералӣ Субҳон Қурбонов дар дафтари “Маркази фарҳангии тоҷикон “Пайванд”” бо намояндагони фаъоли донишҷӯёни маҳаллии тоҷикистонӣ, падару модарон ва соҳибкорони тоҷиктабор вохӯрӣ анҷом дода, барои пешрафти кору фаъолияти диаспораи маҳаллии тоҷик баъзе пешниҳоду тавсияҳои асоснок дод.
Дипломати тоҷик ба Абдулло Саидзода Каримов тавсия дод, ки ҷойнишинҳои хешро аз намояндагони кордону лоиқ интихоб намояд, то аз навидҳо, пешрафт, тазоду норасиҳои тамоми қишрҳои диаспораи маҳаллии тоҷик маълумоти саривақтӣ дар даст дошта бошад ва барои ҳаллу фаслашон оҷилан иқдом гирад.
