Иштироки Консули генералии Ҷумҳурии Тоҷикистон дар шаҳри Екатеринбург дар Вохӯрии намояндагони давлатии Тоҷикистону Россия тавассути тамоси видеоконфронс
Иштироки Консули генералии Ҷумҳурии Тоҷикистон дар шаҳри Екатеринбург дар Вохӯрии намояндагони давлатии Тоҷикистону Россия тавассути тамоси видеоконфронс
Дар нимаи дуюми рӯзи 29 январи соли 2024 Консули генералии Ҷумҳурии Тоҷикистон дар шаҳри Екатеринбург Зафар Сайидзода дар маҷлисгоҳи бинои Ҳукумати вилояти Свердловски Федератсияи Россия дар Мулоқоти онлайнии муовини Губернатори вилояти Свердловск Василий Козлов ва муовини аввали раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Хуршед Мирзо оид ба масъалаи иштироки вилояти Свердловск дар татбиқи лоиҳаҳои сармоягузорӣ дар қаламрави Тоҷикистон, аз ҷумла лоиҳаи сармоягузорӣ оид ба бунёди Маркази нигаҳдорӣ, хушк кардан, ба навъҳо ҷудо кардан, бандубаст ва интиқоли содиротии сабзавоту меваҷоти хушсифату бомаззаи тоҷик дар вилояти Хатлони Ҷумҳурии Тоҷикистон, иштирок кард.
Зимнан зикр гардид, ки ба меваю сабзавоти хушмаззаи Тоҷикистон дар бозори дохилии Урали Миёна, аз ҷумла дар миёни ташкилотҳои савдои шабакавии минтақа, ниёзмандӣ хеле зиёд аст, вале ҳаҷми интиқоли он ба вилояти Свердловск ҳанӯз ба талаботи мавҷуда дархӯр нест. Дар ин иртибот ба таври мушаххас силсилаи иқдомҳои муштараки амалӣ ба хотири ислоҳи ин вазъ ба сӯйи беҳбудӣ дар нимсолаи аввали соли 2024 баррасӣ шуданд.
Дар вохӯрӣ аз ҷониби россиягӣ Вазири сармоягузорӣ ва рушди вилояти Свердловски Федератсияи Россия Вадим Третяков, иҷрокунандаи вазифаи Вазири робитаҳои байналмилалӣ ва хориҷии иқтисодии вилояти Свердловски Федератсияи Россия Олег Александрин, муовини Вазири маҷмааи агросаноатӣ ва бозори истеъмолии вилояти Свердловски Федератсияи Россия Светлана Терехова, директори генералии ҶС "Корпоратсияи рушди Урали Миёна" Андрей Мисюра, мушовири президенти Палатаи савдо ва саноати Урал Лев Крекотен, сармутахассиси Вазорати робитаҳои байналмилалӣ ва хориҷии иқтисодии вилояти Свердловски Федератсияи Россия Анастасия Охрименко иштирок намуданд.
Дар суҳбати онлайнӣ аз ҷониби тоҷикистонӣ ҳамчунин сардорони раёсатҳои Кумитаи давлатии сармоягузорӣ ва идораи амволи давлатии Ҷумҳурии Тоҷикистон Абдуғаффор Ҷамолзода ва Шуҳрат Юсуфзод ширкат варзиданд.
