Консули генералии Ҷумҳурии Тоҷикистон дар шаҳри Екатеринбург ва аъзои Шӯрои ҷамъиятии назди ин Консулгарӣ дар пойтахти уралӣ дар Шоми "Синамои ҷавони тоҷик" иштирок намуданд
Консули генералии Ҷумҳурии Тоҷикистон дар шаҳри Екатеринбург ва аъзои Шӯрои ҷамъиятии назди ин Консулгарӣ дар пойтахти уралӣ дар Шоми "Синамои ҷавони тоҷик" иштирок намуданд
Аз 1 то 5 декабри соли 2023 дар шаҳри Екатеринбурги Федератсияи Россия Фестивал-семинари XX-уми байналмилалии мактабҳои синамоӣ таҳти унвони «Кинопроба» баргузор гашт.
Ин ҷашнвора ва озмун вохӯрии коргардонҳои навкору ва ботаҷрибаи Россия ва намояндагони ҷомеаи синамоии байналмилалӣ мебошад.
Шоми 4 декабри соли 2023 дар толори хурди Хонаи синамои шаҳри Екатеринбург (кӯчаи ба номи Луначарский, 137) вазъу дастовардҳои синамои ҷавони тоҷикро коршиноси шинохтаи синамо, фарҳангшинос, коргардони синамо ва таҳиягар, номзади илмҳои таърих, узви Иттифоқи синамогарони Тоҷикистон Шарофат Арабова дар сатҳи баланди касбӣ муаррифӣ намуд.
Ба барномаи Шоми “Синамои ҷавони тоҷик” асарҳои донишҷӯӣ ва нахустэҷоди коргардонони ҷавони тоҷик, ки дар се соли охир офарида шудаанд, шомил буданд.Филмҳо ба мавзӯоти марбут ба вижагиҳои муносиботи волидону фарзандон дар шароити пуртазоди ҷаҳонишавӣ бо паёмадҳои манфии ахлоқиаш, зиддиятҳои тарзи анъанавию суннатии зиндагӣ ва воқеияти ҳаёти муосир бахшида шудаанд.
Дар ин Шоми фарҳангӣ Консули генералии Ҷумҳурии Тоҷикистон дар шаҳри Екатеринбург Зафар Сайидзода, намояндаи Вазорати меҳнат, муҳоҷират ва шуғли аҳолии Ҷумҳурии Тоҷикистон дар минтақаи Урал Беҳрӯз Холиқов ва ходимони шинохтаю фаъоли диаспораи маҳаллии тоҷикон ширкат варзиданд.
Дар Шоми фарҳангӣ дипломати тоҷик суханронии ҷолибу пурмуҳтавои шодбошӣ намуда, Шарофат Арабоваро бо "Сипоснома"-и муассисаи консулӣ сарфароз сохт.
