Нишасти вазирони корҳои хориҷии Муколамаи Ҳиндустон ва Осиёи Марказӣ
19 декабри 2021 дар Деҳлӣ нишасти 3-юми вазирони корҳои хориҷии Муколамаи Ҳиндустон ва кишварҳои Осиёи Марказӣ баргузор гардид.
Вазирони корҳои хориҷӣ роҳҳои таҳкими абзори мазкур, густариши ҳамкориҳои тиҷоратию иқтисодӣ ва пайвандии байниминтақавӣ миёни Ҳиндустон ва кишварҳои Осиёи Марказиро баррасӣ карданд.
Вазири корҳои хориҷӣ Сироҷиддин Муҳриддин бо таваҷҷуҳ ба зарурати ҳамкории муштарак дар татбиқи иқтидори бузурги рушди иқтисодию сармоягузорӣ қайд намуд, ки Тоҷикистон ба таҳкими бештари фаъолияти Муколамаи Ҳиндустон ва Осиёи Марказӣ аҳаммияти хос зоҳир менамояд. Дар ин замина мусоидат ба раванди татбиқи лоиҳаҳои бузурги зербиноӣ, нақлиётӣ, иқтисоди сабз, рақамикунонӣ ва дигар самтҳои мавриди таваҷҷуҳи тарафайн ҷиҳати тавсеаи иқтидор ва имкониятҳои содиротӣ таъкид гардид.
Гузашта аз ин, намояндагони кишварҳои узви Муколама перомуни равандҳои ҷаҳонӣ ва минтақавӣ, аз ҷумла вазъият дар Афғонистон ва ҷалби ҷомеаи ҷаҳонӣ барои аз байн бурдани мушкилоти гуманитарӣ дар кишвар табодули андеша намуданд.
Дар интиҳо Изҳороти муштарак дар бораи натиҷаҳои нишасти сеюми Муколамаи Ҳиндустон ва кишварҳои Осиёи Марказӣ қабул гардид.
