Сафари кории Консули генералӣ ба вилояти Иркутск

Аз 30 август то 4 сентябри соли 2023 сафари кории Консули генералии Ҷумҳурии Тоҷикистон дар шаҳри Новосибирски Федератсияи Россия ба вилояти Иркутски Федератсияи Россия баргузор гардид.

Дар чорчӯби сафар вохӯрӣ бо роҳбари Намояндагии минтақавии Вазорати корҳои хориҷии Федератсияи Россия дар вилояти Иркутск хонум Курбатова Л.А. ва бо намояндагони мақомотҳои қудратии  вилояти Иркутск баргузор гардид.

Зимни вохуриҳо бо ҷонибҳо ҳолати кунунӣ ва дурнамои рушди ҳамкориҳои дуҷониба дар соҳаҳои иқтисодиёт, тиҷорат, сармоягузорӣ, кишоварзӣ, энергетика, фарҳангӣ - гуманитарӣ ва сайёҳӣ, масъалаҳои будубош ва мушкилоти шаҳрвандони Ҷумҳурии Тоҷикистон, ки дар минтақа кору фаъолият доранд, инчунин дигар масоили мавриди таваҷҷуҳи тарафайн мавриди баррасӣ қарор гирифт.

Дар доираи сафар вохурии Консули генералӣ бо роҳбарони ташкилотҳои ҷамъиятии диаспораи тоҷик, фаъолон ва соҳибкорони ватанӣ низ баргузор гардид.

Бо ҳамватанон вобаста ба дастовардҳои Ҷумҳурии Тоҷикистон дар даврони истиқлолият, дастуру супоришҳо, ки аз Паёми Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олӣ бармеоянд, ҳамчунин иштироки ҳамватанони бурунмарзӣ дар ҳаёти иқтисодию сиёсии ҷумҳурӣ суҳбати муфид баргузор гардид. Иштирокдорони вохӯрии мазкур зимни суханронӣ пуштибинии худро аз сиёсати имрӯзаи роҳбарияти олии кишвар, иқдомҳои ҷумҳурӣ дар пойдории сулҳу субот дар кишвар ва минтақа, корҳои тарғиботию профилактикӣ дар мубориза бо терроризму экстремизм изҳор намуданд.

Зимни вохӯрӣ махсусан доир ба густариши ҳамкориҳои иттиҳодияҳои ҷамъиятӣ оид ба масъалаҳои мусоидат ба ҳалли мушкилоти муҳоҷирони меҳнатии Тоҷикистон, роҳҳои нави мубориза бо ҷинояткорӣ, бахусус дар байни ҷавонон, гузаронидани корҳои тарбиявӣ, фарҳангӣ ва варзишӣ, ҳифзу густариши забонҳои тоҷикӣ ва русӣ миёни насли ҷавони диаспораҳои тоҷик таъкид гардид.

Инчунин зимни сафар хизматрасониҳои консулӣ ба шаҳрвандони Ҷумҳурии Тоҷикистон, ки дар вилояти Иркутск зиндагӣ ва кору фаъолият доранд, расонида шуд.