Оид ба қазияе, ки дар Шимоли кишвар рух дод
Тибқи маълумоти мавҷуда 10 июли соли 2014 соати 11:30 бо вақти маҳаллӣ дар ҳудуди заминҳои кишоварзии хоҷагии кооперативии “Ворух”-и ноҳияи Исфара шаҳрвандони Тоҷикистон бо корҳои гузаронидани қубури обгузар машғул буданд. Ҳамин вақт ба назди онҳо марзбонони қирғиз, ки дар дидбонгоҳи “Тамдиқ” воқеъ дар қитъаи баҳсталаби сарҳадӣ хизмат менамоянд, наздик шуданд ва нисбат ба сокинони осоишта рафтори номатлуб зоҳир карда, талаби ғайриқонунии қатъи корҳо ва тарк кардани мавзеъро пеш оварданд. Марзбонони Тоҷикистон, ки дар наздикӣ воқеъ буданд, барои муайян кардани ҳолати бавуҷудомада, ба ҷои ҳодиса ҳозир шуда, кӯшиш карданд, то амалҳои ғайриқонунии марзбонони қирғизро боз доранд. Дар ҷавоб ногаҳон аз ҷониби марзбонони қирғиз тирпаронии нишондор оғоз гардид. Дар натиҷаи ин амал, 7 сокини осоишта ва як марзбони тоҷик ҷароҳат бардоштанд. Як шаҳрванди Тоҷикистон бар асари ин ҷароҳат дар ҷои ҳодиса ҳалок гардид.
Бояд қайд кард, ки аз ҷониби марзбонони тоҷик силоҳи оташфишон истифода нашуд.
Дар робита ба қазияи мазкур, ки новобаста аз созишҳои чандинкарата оид ба ҳудудҳои мувофиқанашудаи сарҳадӣ ба вуқӯъ пайваст, ҷониби Тоҷикистон вобаста ба нақзи созишҳои номбурда аз тарафи мақомоти алоҳидаи Ҷумҳурии Қирғизистон изҳори нигаронӣ менамояд.
Айни замон дар ҷои ҳодиса ҳайатҳои ҳукуматии ду кишвар таҳти роҳбарии Муовини Сарвазири Ҷумҳурии Тоҷикистон Муродалӣ Алимардон ва Муовини Сарвазири Қирғизистон Абдураҳмон Маматалиев фаъолият доранд.
Бинобар ҳодисаи рухдода, Ҷумҳурии Тоҷикистон барои муайян кардани ҷузъиёти он ёддошти расмиро ба ҷониби Қирғизистон фиристод.
