Олимпичиёни тоҷик дар бозиҳои Берлин бо ду медали тилло мушарраф гардиданд
Сафири Тоҷикистон дар Олмон Имомуддин Сатторов бо ҳайати варзишгарони тоҷик - иштирокунандагони Бозиҳои махсуси ҷаҳонии тобистонаи олимпии Берлин 2023 (Special Olympics World Summer Games 2023) мулоқот намуд.
Дар Сафорати Тоҷикистон дар Берлин бо варзишгарони тоҷик, аз ҷумла Абдулҳамид Эмомов ва Нисора Сафарова, ки дар сабқатҳо - давидан ба масофаи 200 метр ва тенниси рӯйи миз мақоми аввалро касб карда, бо медали тилло сарфароз гаштанд, гуфтугӯи судманд доир шуд.
Аснои суҳбат таваҷҷуҳ ва ғамхории доимии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба варзишгарон, рушди соҳаҳои мухталифи варзиш, оммавигардонии он ва тарғиби тарзи ҳаёти солим миёни аҳолӣ таъкид гардид.
Сафир варзишгарон ва мураббиёнро бо ин дастоварди назаррас ва ҳамчунин Рӯзи байналмилалии олимпӣ, ки ҳамасола 23 июн дар саросари ҷаҳон таҷлил мегардад, табрик намуда, ба онҳо музаффариятҳои нав ба нав ва комёбиҳои бузурги варзиширо таманно кард.
