Иқдоми муштараки сафоратҳои Тоҷикистон ва Нидерланд дар Берлин
Дар остонаи баргузории “Конфронси оби Созмони Милали Муттаҳид – 2023” дар шаҳри Ню-Йорк бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Подшоҳи Нидерланд муҳтарам Виллем Александр, роҳбарони намояндагиҳои дипломатии ин кишварҳо дар Берлин чорабинии муштарак анҷом доданд.
Сафири Тоҷикистон Имомуддин Сатторов ва Сафири Нидерланд Роналд ван Роден дар муроҷиати видеоии муштарак вобаста ба ҳалли мушкилоти глобалии об, гармшавии иқлим, обшавии пиряхҳо, ташабусҳои ҷаҳонии Тоҷикистон ва ҳамкориҳо дар ин самт тамаркуз карданд.
********************************************************************************
Роналд ван Роден:
„Нидерланд кишвари обӣ аст. Мо дар масоили об ҳамеша мубориза мебурдем. Нидерланд роҳҳали мушкилиҳои обро тариқи сохтани сарбандҳо, полдерҳо (минтақаҳои аз баҳр озодшуда, ки махсусан ҳосилхезанд) ва корезҳои обёрӣ пайдо кард. Аммо дар баробар ин, ба мо ҳамеша ва дар ҳама ҷой об лозим аст. Яъне, барои парвариши ғизо, ҳаёт ба сар бурадн ва солим мондан.
Мо мехоҳем донишҳои дар бораи об андӯхтаамонро бо кишварҳои дигар мубодила кунем. Идоракунии об фаромарзӣ аст ва барои ҳама кишварҳо аҳамияти муҳим дорад. Ба ин далел, Нидерланд ҳамроҳ бо Тоҷикистон мизбони Конфронси имсолаи оби Созмони Милали Муттаҳид дар Ню Йорк мебошанд“.
Имомуддин Сатторов:
„Тоҷикистон кишвари дорои захираҳои ғании оби тоза буда, зиёда аз 60 фоизи захираҳои оби минтақаи Осиёи Марказӣ дар Тоҷикистон ташаккул меёбанд.
Истифодаи самараноки захираҳои оби ошомиданӣ барои расидан ба Ҳадафҳои Рушди Устувор нақши муҳим дорад. Тоҷикистон тӯли ду даҳсолаи охир муштаракан бо кишварҳои узви Созмони Милали Муттаҳид ва ниҳодҳои зертобеи он як зумра ташаббусҳои глобалиро пешниҳод намудааст.
Бар асари гармшавии глобалӣ раванди обшавии пиряхҳои дар ҳудуди кишвари мо қарордошта сол то сол суръат мегирад.
Ҳамкории Нидерланд ва Тоҷикистон бешубҳа намунаи он аст, ки чӣ гуна об метавонад кишварҳои мухталифро ба ҳам биёрад. Аз ин рӯ, ҳалли мушкилоти об дар роҳи расидан ба Ҳадафҳои Рушди Устувор саҳми назаррас мегузорад“.
