Сафири Тоҷикистон аз музофоти федеролии Саар боздид ба амал овард
8 феврали соли 2023 Сафири Тоҷикистон дар Олмон Имомудин Сатторов дар доираи сафари кории худ ба музофоти федеролии Саар (Saarland) аз ҷониби Сарвазири ин минтақа хонум Анке Релингер (SPD) ба ҳузур пазируфта шуд.
Пас аз маросими аксбардорӣ ва гузоштани соядаст дар китоби меҳмонони ифтихорӣ, тарафҳо роҷеъ ба мавзӯъҳои рӯзмарра дар бахшҳои иқтисоду саноат, сармоягузорӣ, иқлим, манбаъҳои нерӯи таҷдидпазир, фарҳанг ва маориф табодули назар карданд.
Имомудин Сатторов ва Анке Релингер дар мавриди амиқтар кардани равобит байни Тоҷикистону музофоти федеролии Саар ба мувофиқа расида, ба густариши минбаъдаи онҳо изҳори умед намуданд.
Сафири Тоҷикистон дар доираи сафар инчунин аз Донишгоҳи Саарланд (Universität des Saarlandes), ки дар пойтахти музофот шаҳри Заарбрюккен воқеъ аст, дидан кард.
Дар сӯҳбат бо роҳбарияти Донишгоҳи Саарланд таҳкими равобити байнидонишгоҳӣ бо кишвари мо ва имконияти таҳсили шаҳрвандони тоҷикистонӣ дар ин донишгоҳ баррасӣ шуданд.
Ҳамчунин, дипломати тоҷикистонӣ аз фаъолияти Маркази тадқиқотии Олмон оид ба зеҳни сунъӣ (Deutsche Forschungszentrum für Künstliche Intelligenz) шиносоӣ пайдо намуд.
Дар ин робита, таваҷҷуҳи ҷониби олмонӣ ба қабули Стратегияи рушди зеҳнӣ то давраи соли 2040 дар Тоҷикистон, ҳамчунин фаъолияти марказҳои таҳияи барнома ва кор дар самти зеҳни сунъӣ, аз ҷумла нахустин озмоишгоҳи таҳқиқотӣ оид ба омӯзиши зеҳни сунъӣ дар Осиёи Марказӣ - “TajRupt” ҷалб гардид.
Имомудин Сатторов дар фароварди сафари худ бо ноиби президенти Палатаи саноат ва савдои Саар Оливер Шмитт мулоқот намуд.
Дар меҳвари гуфтугӯ доираи васеи масъалаҳои ҳамкориҳои дуҷониба ва тақвияти ҳамкориҳои минбаъда дар бахшҳои иқтисод ва сармоягузорӣ мавриди баррасӣ қарор гирифтанд.
Foto: © Staatskanzlei Saarland/Pf
