Ҷаласаи 17-уми Комиссияи байниҳукуматӣ оид ба ҳамкориҳои иқтисодӣ миёни Тоҷикистон ва Русия

8-9 феврали соли 2021 дар шаҳри Москва ҷаласаи 17-уми Комиссияи байниҳукуматӣ оид ба ҳамкориҳои иқтисодӣ миёни Ҷумҳурии Тоҷикистон ва Федератсияи Русия баргузор шуд.

Ҳайатҳои ҷонибҳоро ҳамраисони Комиссия – Сарвазири Ҷумҳурии Тоҷикистон Қоҳир Расулзода ва Муовини раиси Ҳукумати Федератсияи Русия Алексей Логвинович Оверчук роҳбарӣ намуданд.

Ҷонибҳо маҷмӯи масъалаҳои ҳамкории кишварҳоро дар самтҳои сиёсӣ, тиҷоратию иқтисодӣ, сармоягузорӣ, фарҳангию гумнитарӣ ва дигар бахшҳо бо равиши созандагӣ мавриди баррасӣ қарор доданд.

Ҳарду тараф ба мувофиқа расиданд, ки бо тамаркуз ба коркарди рӯйкардҳои нав, барои густариши робитаҳои иқтисодӣ ва мушорикати саноатии Тоҷикистону Русия чораҳои зарурӣ андешанд.

Дар рафти ҷаласа ҳайатҳо ҳамкории ду кишварро дар соҳаи кишоварзию хоҷагидорӣ муҳокима намуданд. Бо назардошти иқтидори Тоҷикистон дар парвариши маҳсулоти кишоварзии банландсифату тозаи экологӣ, ҷиҳати андешидани чораҳои зарурӣ барои дарёфти роҳҳои беҳтари расмиёти ҳуҷҷатгузорӣ, аз ҷумла гумрукӣ ва таҳвили нақлиётӣ бо мақсади таъмини мунтазами маҳсулоти Тоҷикистон ба қаламрави Русия, мувофиқа ҳосил шуд.

Дар бахши мушорикати саноатӣ ба ҷониби Русия пешниҳод гардид, ки дар таъсис додани коргоҳҳои муштарак дар заминаи корхонаҳои соҳавии дар Тоҷикистон амалкунанда ва дар минтақаҳои озоди иқтисодӣ, иштироки фаъол намояд.

Ҷонибҳо ҷиҳати афзоиши ҳаҷми боркашонӣ ба мувофиқа расиданд. Бо дарназардошти беҳбудии вазъи беҳдоштию эпидемиологӣ дар Тоҷикистон, ба ҷониби Русия пешниҳод шуд, ки масъалаи зудтар барқарор кардани алоқаи ҳавоӣ миёни ду кишварро баррасӣ намояд.

Зимни ҷаласа масоили ҳамкориҳо дар самти муҳоҷират ба таври фарогир мавриди баррасӣ қарор гирифтанд.

Тадбирҳои дар марҳилаи пандемия андешидашудаи ҷониби Русия дар мавриди таъмини имтиёзҳо нисбат ба муҳоҷирони меҳнатӣ аз Тоҷикистон қайд гардид.

Аз тарафи ҳайати Тоҷикистон масъалаи мақоми ҳуқуқии аъзои оилаи муҳоҷирони меҳнатӣ ва донишҷӯён аз Тоҷикистон, ки зимни иқомат дар Русия дар ҳолати номуайянӣ қарор мегиранд, ба миён гузошта шуд.

Ҷониби Тоҷикистон барои баррасии масъалаи қонунигардонии мақоми шаҳрвандони Тоҷикистон, ки воридшавии онҳо ба қаламрави Русия бинобар содир намудани ҳуқуқвайронкуниҳои маъмурии ҷузъӣ манъ аст, ба ҷониби Русия муроҷиат намуд.

Дар доираи ҷаласа роҷеъ ба ҳамкории ду кишвар дар самти фарҳангию гуманитарӣ табодули афкор сурат гирифт. Тасмим гирифта шуд, ки дар соли 2021 Рӯзҳои фарҳанги Русия дар Тоҷикистон баргузор шавад.

Ҷонибҳо раванди татбиқшавии лоиҳаи иштироки омӯзгорони Русия дар пешбурди фаъолияти таълимӣ дар мактабҳои таълимоти миёнаи Тоҷикистон, инчунин оғози сохтмони панҷ мактаби таҳсилоташон бо забони русӣ дар Тоҷикистонро дар сатҳи баланд арзёбӣ намуданд.

Таваҷҷуҳи махсус ба ҳамкориҳо дар самти тандурустӣ ва таъмини некуаҳволии аҳолӣ аз лиҳози беҳдоштию эпидемиологӣ зоҳир гардид. Ҷонибҳо дар мавриди татбиқи лоиҳаҳое, ки ба табодули таҷриба дар соҳаи ташхис, пешгирӣ ва табобати бемориҳои сироятӣ, ташкили фаъолияти муштараки гурӯҳҳои табибон ва омодагии онҳо равона шудааст, ба мувофиқа расиданд.

Бо назардошти зарфият ва имкониятҳои фаровони табиию фароғатии Тоҷикистон, масъалаҳои марбут ба ҷалби сайёҳон аз Русия баррасӣ шуданд.

Ҳайатҳо натиҷаҳои сафари расмии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе Рустами Эмомалӣ ба Федератсияи Русияро, ки соли гузашта доир шуд, баланд арзёбӣ намуданд.

Аз натиҷаи ҷаласаи Комиссияи байниҳукуматӣ Протокол ба имзо расонида шуд.

Музокирот дар фазои дӯстона баргузор шуд.