Иштироки Сафири Тоҷикистон дар «2020 Sheep Show Convention»

16-18 январи 2020 дар шаҳри Ренои иёлати Невадаи ИМА Сафир Фарҳод Салим дар намоиши «2020 Sheep Show Convention» бо даъвати “Wild Sheep Foundation” ширкат варзид. Чорабинии мазкур ба мақсади тақдими ҷоизаҳо ба шахсони алоҳида барои дастовардҳо, рушд ва афзоиши ҳайвонҳои нодир барпо гардид. Дар чаҳорчӯби намоиши имсола ду ҷоиза барои намояндагони Ҷумҳурии Тоҷикистон тақдим шуд:

• Ҷоизаи “International Conservation Statesman Award” ба Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Давлатшо Гулмаҳмадзода барои комёбиҳои касбӣ дар муҳофизати гӯсфандони нодир дар Ҷумҳурии Тоҷикистон;
• “International Wildlife Conservation Ambassador Award” ба Сафири Ҷумҳурии Тоҷикистон дар ИМА бо дарназардошти эътироф ва қадрдонии комёбиҳои дипломатӣ дар пешбурди муносибатҳо ҷиҳати муҳофизат ва идоракунии гӯсфандони нодир дар Ҷумҳурии Тоҷикистон.

Сафир ҷоизаҳоро қабул намуда, ба ташкилкунандагони чорабинӣ барои қадрдонӣ изҳори сипос намуд. Таъкид гардид, ки дар Тоҷикистон бо ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 2019-2021 Солҳои рушди деҳот, сайёҳӣ ва ҳунарҳои мардумӣ эълон шуда, таҳкими ҳамкориҳо ба амалисозии ин иқдом мусоидат хоҳад кард.