Супоридани нусхаи Эътимоднома аз ҷониби Роҳбари навтайиншудаи Намояндагии Иттиҳоди Аврупо дар Тоҷикистон
13 октябри соли 2014 Роҳбари навтайиншудаи Намояндагии Иттиҳоди Аврупо дар Ҷумҳурии Тоҷикистон Сафир Ҳидает Бишчевич нусхаи эътимодномаи худро ба Вазири корҳои хориҷии Ҷумҳурии Тоҷикистон Сироҷидин Аслов супорид.
Зимни сӯхбате, ки пас аз маросими супоридани эътимоднома баргузор гардид, Сироҷидин Аслов изҳори умедворӣ намуд, ки Сафири нави Иттиҳоди Аврупо барои таҳким ва инкишофи минбаъдаи муносибатҳои дуҷонибаи Тоҷикистону Иттиҳоди Аврупо саҳми сазовор хоҳад гузошт.
Зимни вохӯрӣ тарафҳо қаноатмандии худро нисбати сатҳи ҳамкориҳои Тоҷикистону Иттиҳоди Аврупо баён намуданд. Таъкид гардид, ки барномаи ҳамкории дуҷониба барои солҳои 2014-2020 ба тавсеаи минбаъдаи соҳаҳои маориф, тандурустӣ ва рушди деҳот равона хоҳад шуд. Дар рафти мулоқот ҳамчунин оид ба масъалаҳои минтақавию байналмилалӣ, ҳамкориҳо дар соҳаи обу энергетика, амният, вазъият дар Афғонистон ва дигар масъалаҳои мубрами рӯз мубодилаи афкор сурат гирифт.
Дар фарҷоми мулоқот Вазири корҳои хориҷӣ ба Ҳидает Бишчевич дар фаъолиятҳои ояндаи касбиаш муваффақиятҳоро таманно кард.
