Вохӯрии вазири корҳои хориҷии Ҷумҳурии Тоҷикистон бо намояндаи махсуси Президенти ИМА оид ба Осиёи Ҷанубӣ ва Марказӣ

28 апрели соли 2026 вохӯрии вазири корҳои хориҷии Ҷумҳурии Тоҷикистон Сироҷиддин Муҳриддин бо намояндаи махсуси Президенти Иёлоти Муттаҳидаи Америка оид ба Осиёи Ҷанубӣ ва Марказӣ Серҷио Гор баргузор гардид.

Зимни вохӯрӣ ҷонибҳо вазъи кунунӣ ва дурнамои рушди муносибатҳои дуҷонибаи Тоҷикистон ва Иёлоти Муттаҳидаи Америка дар соҳаҳои сиёсӣ, иқтисодӣ, сармоягузорӣ ва гуманитарӣ, инчунин равобит дар бахши амниятиро баррасӣ намуданд. Ҳамсуҳбатон таваҷҷуҳи мутақобиларо ба таҳкими минбаъдаи шарикӣ ва густариши ҳамкории амалӣ таъкид намуданд.

Ҷонибҳо оид ба вазъияти минтақа табодули назар намуда, аҳаммияти мусоидат ба таъмини субот ва пешгирии хатарҳои гуманитариро зикр карданд. Ҳамзамон зарурати ҳамоҳангсозии талошҳо дар мубориза бо таҳдидҳо ва чолишҳои муосир, аз ҷумла терроризм, экстремизм ва гардиши ғайриқонунии маводди мухаддир, таъкид карда шуд.

Аҳаммияти қолаби минтақавии «С5+1» ҳамчун абзори муассир барои муколама ва таҳкими ҳамкорӣ миёни кишварҳои Осиёи Марказӣ ва Иёлоти Муттаҳидаи Америка махсус қайд гардид.

Ҷонибҳо омодагии худро барои густариши минбаъдаи ҳамкории тиҷоратию иқтисодӣ ва сармоягузорӣ, инчунин рушди табодули маориф ва фарҳангӣ ҳамчун заминаи муҳими шарикии дарозмуддат тасдиқ намуданд.

Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:

Мо дар Фейсбук: www.facebook.com/mfa.tj

Мо дар Твиттер (русӣ): www.twitter.com/MID_Tajikistan

Мо дар Телеграм: t.me/mfa_tj

Мо дар Инстаграм: instagram.com/mfa_tjk

Мо дар Твиттер (англисӣ): twitter.com/MOFA_Tajikistan