Муносибатҳои Тоҷикистон бо Белгия

Муносибатҳои Тоҷикистон бо Белгия

Муносибатҳои дипломатӣ байни Ҷумҳурии Тоҷикистон ва Подшоҳии Белгия 29 апрели 1992 барқарор шудаанд.    

Соли 2001 Сафорати Ҷумҳурии Тоҷикистон дар Брюссел ифтитоҳ гардид, ки он ҳамзамон ҳамчун Намояндагии Ҷумҳурии Тоҷикистон дар Иттиҳоди Аврупо фаъолият мекунад. Сафири Фавқулода ва Мухтори Ҷумҳурии Тоҷикистон дар Подшоҳии Белгия Музаффар Ҳусейнзода аз соли 2023 мебошад.

Сафорати Подшоҳии Белгия дар Тоҷикистон дар ш. Остонаи Ҷумҳурии Қазоқистон қарор дорад. Сафири Фавқулода ва Мухтори Подшоҳии Белгия дар Ҷумҳурии Тоҷикистон Анри Вантигем (аз марти соли 2022) мебошад.

Густариши минбаъдаи муносибатҳо бо Подшоҳии Белгия ба сифати яке аз кишварҳои поягузори Иттиҳоди Аврупо ва макони ниҳодҳои асосии он барои Ҷумҳурии Тоҷикистон аҳаммияти муҳим дорад.

Заминаи рушди муносибатҳои дӯстона ва ҳамкории мутақобилан судманд дар рафти мубодилаи сафарҳои дуҷонибаи сатҳи олӣ гузошта шудааст. Шаш маротиба Президенти Ҷумҳурии Тоҷикистон Эмомалӣ Раҳмон ба шаҳри Брюссел сафар анҷом додааст. (2003, 2004, 2009, 2013, 2015, 2021).

Дар густариши ҳамкориҳои Ҷумҳурии Тоҷикистон ва Подшоҳии Белгия абзори машваратҳои сиёсӣ нақши калидӣ дошта, мунтазам дар ду сол як маротиба баргузор мегардад.

Дар муносибатҳои муосир алоқаҳои байнипарлумонии ҳарду кишвар инкишоф меёбанд. Ёддошти тафоҳум миёни парлумонҳои Тоҷикистон ва Подшоҳии Белгия ба имзо расид ва миёни Маҷлиси намояндагони Маҷлиси Олии Ҷумҳурии Тоҷикистон ва Сенати Подшоҳии Белгия Гурӯҳи дӯстии Иттиҳоди байнипарлумонии Белгия ва Тоҷикистон таъсис дода шудааст.

Ҳамкории Ҷумҳурии Тоҷикистон ва Подшоҳии Белгия дар соҳаҳои иқтисод ва тиҷорат дар марҳилаи густариш қарор дорад.    

Ҳаҷми гардиши мол байни Ҷумҳурии Тоҷикистон ва Подшоҳии Белгия дар моҳҳои январ - сентябри соли 2023 13,528 миллион доллари ИМА-ро ташкил дод.

Ба мақсади тақвияти ҳамкориҳои иқтисодиву фарҳангӣ дар Ҷумҳурии Тоҷикистон Подшоҳии Белгия Консули фахрии худро дар Душанбе 4 июни 2021 таъйин намуд.

Пояи шартномавӣ-ҳуқуқии ҳамкории ду давлат созишномаҳои байниҳукуматӣ ва байниидоравиро дар бар мегирад. Миёни Ҷумҳурии Тоҷикистон ва Подшоҳии Белгия санадҳои дуҷониба дар соҳаҳои сиёсат, иқтисод, тиҷорат, маориф, тандурустӣ сайёҳӣ ва ғайра ба имзо расиданд.

                                                                                                                                                                                                                                                                                                                           Ноябр, 2023