Брифинг оид ба омодагӣ ба Саммитҳои сентябрӣ дар Душанбе

30 августи соли 2023 дар Вазорати корҳои хориҷӣ барои намояндагони корпуси дипломатӣ ва васоити ахбори омма брифинг оид ба омодагӣ ба Вохӯрии панҷуми ҷашнии машваратии сарони давлатҳои Осиёи Марказӣ ва ҷаласаи навбатии Шӯрои сарони давлатҳои муассиси Фонди байналмилалии наҷоти Арал, ки рӯзҳои 14 ва 15 сентябри соли ҷорӣ дар ш.Душанбе баргузор мегарданд, доир гардид.

Зимни брифинг муовини вазири корҳои хориҷӣ Содиқ Имомӣ оид ба рӯзнома, номгӯи санадҳои ниҳоӣ ва доираи иштирокчиёни Вохӯрии панҷуми машваратии сарони давлатҳои Осиёи Марказӣ, инчунин чорабиниҳои иловагие, ки дар доираи он баргузор мешаванд, маълумот дод. Хусусан қайд карда шуд, ки дар натиҷаи Вохӯрии машваратӣ бастаи иборат аз панҷ санад барои қабул омода мешавад, ки яке аз ҳуҷҷатҳои муҳим Изҳороти муштараки сарони давлатҳои Осиёи Марказӣ хоҳад буд. Илова бар ин, дар чаҳорчӯби Вохӯрии машваратӣ дар нимаи аввали моҳи сентябри соли ҷорӣ бо ташаббуси Ҷумҳурии Тоҷикистон 16 чорабинии дигар дар шаҳри Душанбе дар соҳаҳои иқтисод, саноат, маориф, нақлиёт, илму фарҳанг, ҷавонон ва варзиш ба нақша гирифта шудааст.

Дар заминаи омодагиҳо ба ҷаласаи навбатии Шӯрои сарони давлатҳои муассиси Фонди байналмилалии наҷоти Арал ба иштирокчиёни брифинг оид ​​ба масъалаҳои барои баррасӣ ба нақша гирифташуда, аз ҷумла, оид ба рушди ҳамкорӣ ҷиҳати боз ҳам беҳтар намудани хоҷагии об, вазъи экологӣ ва иҷтимоию иқтисодии ҳавзаи баҳри Арал, таҳкими нақши ФБНА дар ҳалли масъалаҳои обу энергетикӣ дар минтақа, инчунин баланд бардоштани обрӯи ФБНА дар арсаи байналмилалӣ маълумот дода шуд.

Дар брифинг роҳбарони намояндагиҳои дипломатӣ, инчунин дипломатҳое, ки дар Душанбе аккредитатсия шудааанд ва намояндагони васоити ахбори омма иштирок намуданд.

Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:

Мо дар Фейсбук: www.facebook.com/mfa.tj

Мо дар Твиттер (русӣ): www.twitter.com/MID_Tajikistan

Мо дар Телеграм: t.me/mfa_tj

Мо дар Инстаграм: instagram.com/mfa_tjk

Мо дар Твиттер (англисӣ): twitter.com/MOFA_Tajikistan