Ҳамкории Тоҷикистон бо Намояндагии Кумитаи Байналмилалии Салиби Сурх

08.07.2019 09:10

Кумитаи байналмилалии Салиби Сурх (КБСС) намояндагии худро моҳи январи соли 1993 дар Душанбе кушодааст. Рӯзи 14 июли соли 2003 Созишнома оид ба мақоми намояндагии КБСС миёни Ҷумҳурии Тоҷикистон ва КБСС ба имзо расида буд. Хонум Ангелика Шопп аз моҳи октябри соли 2020 ба ҳайси Роҳбари Намояндагии КБСС дар Тоҷикистон фаъолият намуда истодааст.

Моҳи сентябри соли 2013 бо ризоияти Ҳукумати Тоҷикистон Дафтари КБСС дар Душанбе барои расонидани кумаки башардӯстона ба Афғонистон ифтитоҳ шуд, ки бар асоси он ба шаҳрҳои бузурги Афғонистон барои расонидани кумакҳои тиббӣ ба аҳолӣ мунтазам парвозҳо анҷом дода мешаванд.

Инчунин Хазинаи махсуси маъюбони КБСС (MoveAbility) барои омӯзиши мутахассисони миллӣ ёрии техникӣ, машваратӣ ва молӣ мерасонад. Ҳамчунин, Муассисаи давлатии “Заводи протезу ортопедии ш. Душанбе” ва филиали он дар шаҳрзои Хуҷанд ва Кулоб бо таҷҳизоти техникӣ таъмин гардиданд.  

КБСС ба Маркази миллии қонунгузории назди Ҳукумати Ҷумҳурии Тоҷикистон дар иҷроиши тадқиқот мувофиқи қонунгузории миллӣ, меъёрҳои байналмилалӣ, ки ба ҳуқуқи шахсони гумшуда ва оилаҳои онҳо тааллуқ дорад, дастгирӣ намудааст.

КБСС барои паҳн намудани дониш дар бораи ҳуқуқи башардӯстонаи байналмилаӣ (ҲББ) ва дигар меъёрҳои башардӯстона миёни вазорату идораҳо, қувваҳои мусаллаҳ ва мақомоти ҳифзи ҳуқуқ, ҷомеаи шаҳрвандӣ, ба вижа донишгоҳҳо кумак мекунад. КБСС ба таври мунтаззам чорабиниҳои байналмилалӣ, минтақавӣ ва миллӣ оид ба ҲББ барои намояндагони сохторҳои давлатӣ бо мақсади ривоҷ додани иҷроиши ҲББ дар сатҳи миллӣ ташкил мекунад.

КБСС ба Ҷамъияти Ҳилоли Аҳмари Тоҷикистон барои рушди иқтидори мақомоти давлатӣ дар соҳаҳои гуногун, аз ҷумла расонидани ёрии башардӯстона дар ҳолатҳои фавқулода, кумаки равонӣ ба шахсони аз оилаҳояшон ҷудошуда ва барқарор намудани робита бо онҳо, дар ҳамгироӣ бо шаҳрвандони ҷумҳурӣ, ки ба Ватан аз минтақаҳои ҷангзада баргаштаанд ва поксозии минаҳо фаъолиятро ба роҳ монда истодаанд.

Дафтари КБСС, Федератсияи Байналмилалии Ҷамъиятҳои Салиби Сурх ва Ҳилоли Аҳмар ва Ҷамъияти Ҳилоли Аҳмари Тоҷикистон аъзои платформаи REACT (Гурӯҳи арзёбии ҳолатҳои изтирорӣ ва ҳамоҳангсозӣ) буда, ба аҳолии аз офатҳои табиӣ осебдида кумакҳои башардӯстона мерасонанд.

Намояндагии КБСС дар Тоҷикистон ҳамасола дар чаҳорчӯби ҳамкориҳои КБСС бо ниҳодҳои давлатӣ нақшаи чорабиниҳои муштаракро имзо мекунад.

Дар доираи татбиқи Барномаи ҳамкории намояндагии КБСС ва Вазорати мудофиа барои соли 2021 Котиботи КБСС дар машқҳои кишварҳои узви СААД «Ҳамкории мутақобила-2021» иштирок намуд.

Нигористон

Тақвим