Брифинг оид ба Конфронси оби СММ дар ЮНЕСКО

6 марти соли 2023 дар қароргоҳи Созмони Милали Муттаҳид оид ба масъалаҳои маориф, илм ва фарҳанг (ЮНЕСКО) дар шаҳри Париж дар доираи Вохӯрии иттилоотӣ оид ба саҳми ЮНЕСКО дар баргузории Конфронси оби Созмони Милали Муттаҳид (22-24 марти соли 2023 ш. Ню-Йорк) брифинги намояндаи доимии Ҷумҳурии Тоҷикистон дар назди ЮНЕСКО Ҷамолиддин Убайдулло оид ба конфронси дарпешистода баргузор гардид.

Зимни суханронӣ намояндаи доимии Тоҷикистон ба ҳозирин оид ба ташаббусҳои байналмилалии Тоҷикистон марбут ба об, дар бораи чораҳои тадорукотии Конфронси оби СММ бо ҳамраисии Ҷумҳурии Тоҷикистон ва Подшоҳии Нидерланд ва ҳамзамон аҳамияти ин чорабинӣ барои ҷомеаи байналмилалӣ маълумот манзур намуд. Аз ҳозирин саҳми бештару иштироки фаъол дар Конфронс ва амалисозии натиҷаҳои он даъват гардид.

Қобили зикр аст, ки дар вохӯрии мазкур беш аз 200 намояндагони кишвару созмонҳои ҷаҳон ба таври ҳузурӣ ва маҷозӣ ширкат варзиданд.